Եվրոպական խորհրդարանը բեկումնային բանաձև է ընդունում իսլամիստական ներթափանցման դեմ

Եվրոպական խորհրդարանը կողմ է քվեարկել իսլամիստական ներթափանցմանը հակազդող պատմական բանաձևին՝ անվանապես նշելով «Մուսուլման եղբայրները» և դրա հետ կապված կառույցը՝ Forum of European Muslim Youth and Student Organisation (FEMYSO)-ն։

2026 թվականի հոկտեմբերի 8-ին օրենսդիրները 381 կողմ, 167 դեմ ձայներով, 15 ձեռնպահի դեպքում քվեարկեցին՝ իսլամիստական ներթափանցումն ու ցանցերը բացահայտելու օգտին՝ կոչ անելով խստացնել ԵՄ միջոցների նկատմամբ վերահսկողությունը, որպեսզի ֆինանսավորումը չհասնի քաղաքական իսլամի հետ կապված խմբերին։ Բանաձևը նաև խնդրում է ԵՄ կառավարություններին ուսումնասիրել՝ արդյոք «Մուսուլման եղբայրների» հետ կապված խմբերը պետք է ներառվեն ԵՄ ահաբեկչական ցուցակում, ասված է Եվրոպական խորհրդարանի մամուլի հաղորդագրության մեջ։

«Իսլամիստական ներթափանցմանը և «Մուսուլման եղբայրների» ցանցի ազդեցությանը հակազդելու ԵՄ ռազմավարության անհրաժեշտության մասին» վերտառությամբ բանաձևը նախազգուշացնում է, որ սեպարատիզմը, զոհի կերպարը, հակասեմիտիզմը, Իսրայելի հանդեպ ատելությունը, դավադրապաշտական պատումները, աշխարհիկության վիճարկումը և գենդերային հավասարությունը կասկածի տակ դնելու համար կրոնի օգտագործումը կարող են լինել իսլամիստական ազդեցության ցուցիչներ։

Բանաձևը նախազգուշացնում է, որ իսլամիզմը գործում է ասոցիացիաների, հիմնադրամների և մշակութային, կրթական, կրոնական, բարեգործական, համալսարանական, երիտասարդական, խտրականության դեմ պայքարի կամ սոցիալական արդարության կառույցների էկոհամակարգի միջոցով, ընդ որում՝ «Մուսուլման եղբայրները» կազմում են «այդ անդրազգային իսլամիստական ցանցերի արքետիպը»։

Փաստաթղթում բացատրվում է, թե ինչպես են իսլամիստական ցանցերը հաճախ որդեգրում հիմնարար իրավունքների, ներառականության, բազմազանության, միջմշակութային երկխոսության, հակառասիզմի և հակախտրականության բառապաշարը՝ միաժամանակ խթանելով «տարանջատման, համայնքային ճնշման կամ ժողովրդավարական սկզբունքների վիճարկման տրամաբանությունը»՝ որպես տրոյական ձի՝ մուսուլման փոքրամասնությունների պաշտպանության քողի տակ ինստիտուցիոնալ լեգիտիմացում ձեռք բերելու համար։

Բանաձևն անդրադառնում է «ԵՄ միջոցների յուրացմանը, մասնավորապես ԵՄ-ի կողմից ֆինանսավորվող ծրագրերին մասնակցության միջոցով» այնպիսի կառույցների կողմից, ինչպիսիք են FEMYSO-ն, European Network Against Racism-ը, Al Sharq Forum-ը, Islamic Relief Worldwide-ը և Գազիանթեփի համալսարանը՝ չնայած «Մուսուլման եղբայրների» կամ քաղաքական իսլամի հետ նրանց կապերին։

Աջ թևի եվրոպատգամավորները ահազանգում են իսլամիստական ներթափանցման մասին

«Իսլամիստական ներթափանցումը միշտ չէ, որ սկսվում է կրակոցների ձայնով։ Այն սկսվում է ժպիտով, կոկիկ կապած փողկապով և մարդու իրավունքների աղավաղված լեզվով։ Այն սպանում է, երբ կարող է, և ներթափանցում է, երբ չի կարող»,- հոկտեմբերի 7-ին Ստրասբուրգում պատգամավորներին ասաց ֆրանսիացի եվրոպատգամավոր Սելին Իմարը (Céline Imart)՝ նշելով ՀԱՄԱՍ-ի իրականացրած՝ 1,200 իսրայելցի խաղաղ բնակչի կոտորածի երրորդ տարելիցը։

«Դադարենք միամտությունն անվանել “երկխոսություն”։ Դադարենք մեր հավանությունը փնտրողներին անվանել “գործընկերներ”։ Դադարենք որևէ ասոցիացիա “ներկայացուցչական” անվանել միայն այն պատճառով, որ այն իր դրամաշնորհային հայտերը համեմում է “բազմազանությամբ և ներառականությամբ”»,- կոչ արեց Իմարը, ով Եվրոպական ժողովրդական կուսակցության խմբակցության անունից կազմել և Եվրոպական խորհրդարան էր ներկայացրել բանաձևը։

«Եղավ։ Եվ սա պատմական է»,- քվեարկությունում հաղթելուց հետո հաղթականորեն գրեց Իմարը X-ում։ «Ես կոտրեցի տաբուն, որը Եվրոպան շղթայի պես քարշ էր տալիս իր հետևից. այս հաղթանակը նշանակում է դոկտրինալ խոշոր տեղաշարժ ինստիտուտներում»։

Բելգիացի օրենսդիր Սոֆի Վիլմեսը «Մուսուլման եղբայրներին» անվանեց «բարձր մակարդակի և առաջնահերթ սպառնալիք այն առումով, որ այն կարող է հանգեցնել հակաժողովրդավարական վարքագծի, բևեռացման և հիմնարար իրավունքների խախտումների»՝ ընդգծելով, որ սրանք Բելգիայի անվտանգության և հետախուզական ծառայությունների եզրակացություններն են։

Ձախ կուսակցությունները բանաձևը դատապարտում են որպես «իսլամաֆոբ»

Թեժ բանավեճի ընթացքում ձախ և մուսուլման պատգամավորները միավորվեցին՝ դատապարտելու բանաձևը որպես «իսլամաֆոբ», դավադրապաշտական և բոլոր մուսուլմաններին խարանող։

Ֆրանսիացի պատգամավոր Քլոե Ռիդելը (Chloé Ridel) Սոցիալիստական կուսակցությունից և Եվրոպական խորհրդարանի Սոցիալիստների և դեմոկրատների առաջադեմ դաշինքի խմբակցությունից քննադատեց առաջարկը՝ որակելով այն «իսլամաֆոբ», բայց «այս անգամ Եվրոպայում իսլամիստական ներթափանցման մասին բանաձևի քողի տակ»։

Ռիդելը պնդեց, որ Իմարի նման քաղաքական գործիչները բացակայում են, երբ խոսքը վերաբերում է «ֆունդամենտալիզմների» դեմ պայքարին, ինչպիսիք են «աբորտների դեմ կաթոլիկ ֆունդամենտալիստական կազմակերպությունները», «Թրամփի ներթափանցումը մեր քաղաքական համակարգեր» և «նեոնացիստական խմբերը կամ հակասեմական ինֆլյուենսերները»։

Ծայրահեղ ձախ և իսլամիստամետ La France insoumise (LFI) կուսակցության անդամ Դամիեն Կարեմը (Damien Carême) պահպանողական օրենսդիրներին մեղադրեց «մեզ դավադրության տեսությունների մեջ սուզող բանավեճ» նախաձեռնելու մեջ։ Նա հավելեց. «Աջ թևը, ծայրահեղ աջերը և նրանք, ովքեր պնդում են, թե ներկայացնում են կենտրոնը, մեզ ասում են, թե մեր թիկունքում մուսուլմանական դավադրություն է հյուսվում՝ առանց ամենաչնչին ապացույցի»։

Ֆրանսիացի եվրոպատգամավոր Մաժդուլին Սբաին (Majdouline Sbaï) դժգոհեց, որ հրեաներից հետո մուսուլմաններն են դարձել «նոր թիրախը»։ «Ես մուսուլման եմ, ես Հանրապետության ընտրված ներկայացուցիչ եմ, խորհրդարանի անդամ, և ես կմնամ այստեղ՝ ձեզ լսելու և ձեզ հետ պայքարելու»,- ասաց սոցիոլոգը և Կանաչների կուսակցության անդամը։

«Մուսուլման եղբայրների» գծով փորձագետը ափսոսում է եվրոպատգամավորների՝ ներթափանցման ռազմավարությունների մասին անտեղյակության համար

«Սա Եվրոպական խորհրդարանի մակարդակով գիտակցման միայն սկիզբն է։ Ձախ-աջ բաժանումը հատկապես ուժեղ է, բայց բանաձևն ընդունվեց, որովհետև կենտրոնը հիմնականում քվեարկեց աջերի հետ»,- Focus on Western Islamism-ին (FWI) ասաց «Մուսուլման եղբայրների» հանրահայտ փորձագետ Ֆլորանս Բերժո-Բլակլերը (Florence Bergeaud-Blackler)։

«Պարզ ասենք՝ բանաձևը չի արգելում «Մուսուլման եղբայրներին»։ Այն կոչ է անում ռազմավարություն մշակել եղբայրների ներթափանցման դեմ»,- ընդգծեց Բերժո-Բլակլերը՝ The Muslim Brotherhood and Its Networks: The Investigation գրքի հեղինակը։ «Այլ կերպ ասած՝ ամեն ինչ սկսվում է հիմա։ Աջերի և կենտրոնի միջև արդեն տարաձայնություններ կան, և աջերը, կենտրոնն ու ծայրահեղ աջերը համաձայն չեն ձեռնարկվելիք քայլերի շուրջ»։

«Եվրոպատգամավորների շրջանում եղբայրականության մասին անտեղյակության մակարդակը նույնպես շատ բարձր է մնում»,- զգուշացրեց նա։ «Ոմանք արգելքներ են ուզում, մյուսները՝ ոչ։ Ոմանք համարում են, որ գլխաշորն իսլամիստական չէ, մյուսները՝ որ լողավազաններում գենդերային տարանջատումն ավանդույթ է, այլ ոչ թե իսլամիստական պարտադրանք»,- հավելեց նա։

«Բանավեճը լինելու է իսլամի և իսլամիզմի միջև սահմանագիծ քաշելու շուրջ,- բացատրեց Բերժո-Բլակլերը։- Ձախերը հարցը կքաղաքականացնեն այնքան, որքան կարող են՝ խոչընդոտելով միջոցառումների ընդունումը։ Եվրոպատգամավորները պետք է պատրաստվեն այս թեմայով։ Ամենից առաջ՝ նրանք չպետք է այն վերածեն կուսակցական քաղաքական հարցի»։

Եվրոպական մուսուլմանական կառույցը բանաձևը համեմատում է նացիստական Նյուրնբերգյան օրենքների հետ

Կտրուկ ձևակերպված հայտարարության մեջ Ստրասբուրգում տեղակայված European Muslim Initiative for Social Cohesion (EMISCO)-ն բանաձևը համեմատեց նացիստական ռեժիմի Նյուրնբերգյան ռասայական օրենքների հետ՝ նախազգուշացնելով «մուսուլմանների նկատմամբ կասկածի նորմալացման» մասին։

Բանաձևի կողմնակիցները «քաղաքական իսլամի և իսլամի՝ որպես կրոնի, միջև տարբերակումը ներկայացնում են որպես երաշխիք։ EMISCO-ն կարծում է, որ այս ներկայացումը քողարկում է բացառող մոտեցում, որը խոչընդոտում է մուսուլմանական համայնքների տեսանելի, հավասար և ազատ մասնակցությունը եվրոպական կյանքին»,- ընդգծվում է հայտարարության մեջ։

Կառույցը պնդեց, որ Պաղեստինի հետ համերաշխությունը, հիջաբ կրելու իրավունքը և խտրականության դեմ պայքարը «օրինական քաղաքացիական գործունեություն են, այլ ոչ թե ծայրահեղականության ապացույց»՝ նշելով, որ «նույնիսկ պարտադիր ուժ չունենալով՝ բանաձևը ռիսկ է պարունակում խրախուսելու օրինական քաղաքացիական մասնակցության ազգային սահմանափակումները»։

«Մուսուլմանական նախաձեռնությունները համակարգված կերպով որպես քաղաքական իսլամի հորինված ծրագիր ներկայացնելն առանց որևէ իրական հիմքի թիրախավորում է նաև այն մուսուլմաններին, ովքեր ներգաղթյալ ծագում չունեն»,- նկատեց EMISCO-ն՝ գովաբանելով ձախ թևի եվրոպատգամավորներին և քաղաքացիական հասարակության որոշ կազմակերպությունների, այդ թվում՝ European Network Against Racism-ին (ENAR), բանաձևը դատապարտելու համար։